Cacahing Hawa Napsu

Assalamu'alaikum Wr. Wb.

Sugeng Dalu para kadang Sutrisna Sedaya Kakung sumawana Putri kang satuhu kinabekten lan kang satuhu kinormatan, mugi-mugi kita Sedaya pinaringan Bagas kawarasan lan ugi tansah jinangkung GUSTI ALLAH SWT, Aamiin.....

HAWA NEPSU PAPAT JRONING MANUNGSA, KADYA KUDA PAPAT NGGERET KRETA

Nalika dititahake ing ngarcapada (ngalam ndonya) dening Gusti Allah kang Agawe Urip, manungsa digawani pawitan akal, nepsu lan budi (cipta, rasa dan karsa). Hawa nepsu iku cacahe papat, yaiku nepsu lawwamah, amarah, sufiyah lan muthmainnah.

1. Nepsu lawwamah, iku panggonane ing weteng, yaiku nepsu ngelak, luwe lan ngantuk.
2. Nepsu amarah, yaiku nepsu sing kawujud nalika nesu, srei lan drengki. 
3. Nepsu sufiyyah, yaiku nepsu kang nuwuhake birahi (nafsu sex), kangen lan tresna marang lawan jinis.
4. Nepsu muthmainnah, yaiku kabecikan sing kawujud ing katentreman batin. Seneng marang kabecikan lan luhuring budi, uga kasenengan marang guna lan kaya.

Hawa nepsu papat iku sejatine apik kabeh nanging sekaligus uga ala kabeh, gumantung piye carane menungsa ngolah hawa nepsune.

Yen diumbar, hawa nepsu papat iku bakal nuwuhake dredah (bencana) lan masalah, menawa bisa ngatur (mengendalikan) gedhe utawa cilike, hawa napsu papat mau migunani ing ngaurip. Dadi, nepsu papat minangka sarana murih tekan papan panggoan sing kita tuju.

Bebasan kreta sing ditarik jaran papat, kita minangka kusir kudu bisa nyekel talinining kendhali supaya penak lakune tekan tujuan. Kosok baline yen kusir malah manut playune jaran, mesti ora tekan panggonan sing dituju malah bisa kecegur jurang.

Mula, manungsa urip kudu tansah nyaket marang Gusti Alah, kanthi meper (mengendalikan) hawa nepsu. Mangga ing wulan Pasa sing suci iki kita ngibadah siyam lan meper hawa nepsu.

Nuwun ....

Salam paseduluran kebak katresnan

🙏🙏🙏

Wassalamu'alaikum Wr. Wb.